Jako mirava la ora i el ekran en el ayroporto; keria saver deke el bolo de El Al en el kualo venia su primo Avimeir venia atradrado. A la fin, era amostrado en la tabela; otrunos puntikos i Aviko estaria de vakansas kon su famiya maternala en la Beljika! No se topava kon su primo desde su Bar Mitsva en ek Kotel.
—Venido bueno, kerido! Tuvites un bolo aserenado?
—Baruh ashem, dinguna kreatura yorava i la komida glatt muy savorida!
—Mazaloso ke sos! Siempre ke tomo un avion me topo kreaturas ke yoran i azen bruidos i munchas vezes no pueden ofrir komida kasher
—Atyo, i komo azes, primo?
—Kuando viajamos, tu tia Flora siempre mos apronta unos boyikos ke metemos en la chanta; ama si topan komida vegana en el frijider del avion, la aresivo. Ayde, vamos arekojer tu bagaje ke es tadre i vamos pedrer el treno!
Mientres ke el treno se aleshava de la Gara Sentrala de Bruselas verso Antuerpia, Jako mirava ke Avimeir tenia peyot tras las orejas i sus tsitsiyot eran muy lungos i godros; los yevava por ahuera del pantalon; kozas de lehlis vistidos de preto i blanko, disho de si para si.
En la noche, Jako dechidio amostrar un poko de la sivdad a su primo i bever unas biras; dizen ke Beljika tiene las mas savoridas biras de la Evropa, afilu kon kupas aprontadas para kada tipo de bira. En aboltando a kaza dospues de unas sesh biras, toparon unos marrokanos dando una haftona a una manseva vestida de kolorado ke arogava ayudo; Aviko, ke fue askier en la armada israeliana, topo un palo en el chop i salto presto komo en un djuego de komputer, aharvando a kada uno de los arabos, fina ke la desharon i fuyeron korriendo.
—Estas buena?— Demando Jako— Puedemos telefonar al polis o mijor envitamos un ambulans
—No, al polis no! Esto buena …guay! Vo estar buena —disho la manseva, abokada i endoloriada, arrefregando una de sus pachas
—Guay, keres ke andemos kon ti verso tu kaza? No kreygo ke los arabos abolten a deranjarte, ama mijor ke no andes sola —disho Aviko
Jako miro a su primo, surprizado.
—Mersi muncho, me kedi muy espantada, ama puedo kaminar sola. Mersi
—Komo te yamas? —Demando Aviko
—Denise. Enchanté
—Un plazer; yo me yamo Avi, el es mi primo Jacques
En tornando a kaza, Jako le disho a Aviko kon kara de kere azerle barraganadas:
—Fuites muy kavayerozo esta noche, todo un macho alfa israeliano halis, askier de elita— alevantando los muskulos de los brazos i el pecho
—Hahaha lonso, no puedemos inyorar una manseva kon menester de ayudo, los moros la estavan aharvando. Endemas, es ermozika, no?
—No tenia konosensia ke te atiravan las karuchas— disho Jako kon la seja alevantada
—Karucha? Guay Jako, ke koza dizes?
—No te apersivites ke es un ombre vistido de mujer?
—Ke bavajada estas diziendo, primo? No mirates ke tiene facha i puerpo de mujer, kon tetas i..
—i kon pata! —kompleta la frasa Jako, riyendo i aziendo kon el braso un kalup komo de ama.
Kaminaron unas adas en la sivdad sin avlar dinguna koza, fina ke yegaron a la fragua ande bivia la famiya de Jako
—Nu, i esta kayades? Kedates enkantado? Dezime, es la prima vez ke te topas una manseva trans? —Demando Jako en entrando al asansor
—Saves ke mi famiya es muy muncho relijioza; En Kiryat Arba, ande yo moro, no topamos djente komo eya
—Ama en la armada israeliana tienen askieres trans! Lo miri el otruno dia en los haberes de la televisyon!
—Si, ama ombres. Bueno, mujeres ke dospues del djerahlik, de la operasion i ke les meten ormonas, agora son ombres
—Bueno, auzate; ke este kartie ande se topan los bares tiene munchas karuchas, ke lavoran en kazas de putanas. Venido Bueno a l’Evropa!
—Ken te disho ke eya es putana? —demando Aviko, surprizado
—No mirates komo andava vistida? Todas lavoran komo putanas. Tenes konosida una trans ke no seya putana?
—Si, Dana International, la ke reushito en Evrovisyon!
—Djusto, pue ser. Ama aki en Antuerpia no tengo visto dinguna ke no lavore en el kartie kolorado.
La facha espantada de Denise kuando la aharvavan los arabos no se efassava del meoyo de Aviko. Komo puedia un ombre tener facha i puerpo de mujer i ser tan grasioza i delikada? Pue ser deke no es israeliana i no ambezo a defenderse en la armada por esto no desvelopo muskulos de ombre, disho de si para si. Por el su aksan paresia ser brasiliana.
En Alhad, Aviko salio a sorretear por la sivdad sin su famiya i konoser un poko mas de Antuerpia mientres ke eyos lavoravan; keria profitar sus vakansas deke no tenia auzado vijitar otrunos payises. En aboltando, dospues de telefonar a su tiya Flora, entro en la patiseria d’embasho de la fragua ande morava su famiya i merko unas dulsurias para el kave de la komida de midi. Un grup de mujeres entraron a merkar frandjolas; ensupito, miro una facha konosida.
—Denise?
—Avi? Guay, ke haber? —Demando Denise, kon kara un poko de verguensa deke las otras mansevas trans la miravan kon ojos de inkizision
—Todo bueno, baruh ashem— disho Aviko— Vos keresh asentar unos puntikos? Keresh kave, alguna dulsuria?— Demando Aviko, tentanto yamar al garson
—Guay Denise, i ken es este mansevo tan garbozo? —Demando una de las mansevas ke yegaron kon eya
—Kristal, Avi i su primo me salvaron de los arabos ke me aharvaron la otra vez, te akodras ke vos konti a todas?
—Si, m’akodro, el askier israeliano! Guay, ama es mas yakishkli de lo ke mos dishites, kerida!
—Hahaha, mersi! Oy estas un poko diferente, Denise— disho Aviko atabafado por el kumplido, mirando ke eya si tenia un poko kara de manseviko kuando no tenia makiaj, ama la transura no se puedia detektar pishin.
Aviko se kedo echizado otruna vez kon los kaveyos lungos de Denise i la marka enriva del musho ke aparesia komo de una top-model. Komo un ombre puedia tener kaveyos tan ermozos i azer djilves de manseva tan naturalmente? Siempre penso ke una mujer trans era un ombre ke azia de aktrisa todo el diya.
—Bueno, no tengo makiaj i sali de kaza en vestimenta de azer espor, tornimos de alevantar alteras en el salon de gymnastik
—Kale mantener el puerpo duro para los pasientes! —disho Kristal, ojeteando a Aviko
—Pasientes? Sos doktora? —Demando Aviko
—No kerido, ama les kito la sehora ke se toman por morar kon sus mujeres, a lo manko media orika— disho Kristal, enderechando las tetas por enriva del sweatshirt
Aviko tenia kara ke no entendia dinguna koza.
—Bueno, mozotras nos vamos —disho Denise— al vermos, Avi!
—Al vermos, semanada buena! —Arespondio Aviko, kon mas demandas ke repuestas en su meoyo. Durante el kusur del dia, no deshava de pensar en Denise i en Kristal. —Deke no le demandi su numero de telefon? Ke lonso!— disho de si para si
Aviko no arretava de pensar en Denise. Komo puedia una manseva ser parida en el puerpo de un ombre? El Dio es perfekto, no puedia yerrarse. Ama egizten operasiones para enderechar este «yerro». Pue ser ke El Dio keria azer a Denise de esta manera, ni totalmente mujer ni totalmente ombre? Pue ser el tikun ke kale azer una neshama por los yerros de su vida d’alkavo? Ama ainda eya era un mansevo ke lavorava aziendo sekso kon ombres, i esto esta defendido en la Tora. Guay! Aviko sentia ke la kavesa le keria eksplotar, entre sus munchos dubios respekto la ovra de El Dio i la ermozura de Denise.
Dospues de dos dias, ya en kama presto para dormir dospues de abortar de la plaj de Ostende, Aviko bushko en su telefon i topo unos filmikos sovre de la vida de las lavorantes seksualas trans. Ensupito, i sin pensar, eskrivio “mansevas trans en Antuerpia”. Topo una oja web kon un katalog de mansevas vistidas komo las del Moulin Rouge. Miro una oja, i otra i otra …fina ke topo kon una foto de Denise. Unos puntikos dospues, ya tenia la informasion ke bushkava: Kaleja Schipperstraat i un numero de telefon selular; ser askier en la unita Duvdevan tenia ke ser fruktuozo en la vida ahuera de la armada.
Se troko las pijamas por un pantalon i una kamiza, i salio en kayades mientres la famiya durmia.
