Anke la majorita de los tekstos ke tengo eskritos en mis blogs i los kuentos kurtos ke tengo publikado se topan en kastilyano, tengo komo buto personal eskrivir dia i dia mas en la lingua djudeo-espanyola. Deke esto aziendo esto, kuando malorozamente es una lingua avlada por menos de 150.000 personas, la majorita de eyas aedadas i ke no la ambezaron a sus ijos o inyetos?
Por esto es ke esto eskriviendo en la muestra lingua, el espanyol muestro – una de las dos maneras de yamarla; otras son djudio, djidio, djudezmo, espanyoliko, ladino i djudeo-espanyol; ladino es kulaneado por akeyos ke tienen komo lingua maternala el ivrit o el inglez, deke es yamada ansi; dizen ke djudeo-espanyol es una manera de yamarla muy muncho de akademia, ama yo kreygo ke es la mas direkta, deke la lingua es la lingua de los djudios arrondjados de la Espanya.
Es la lingua de la galut, inchida de saudade (komo dizen los portugezos) por la tierra en la kuala los djudios nasieron, se engrandesieron, amaron, meldaron i mos desharon la buena vida. Ama es endemas la lingua ke se desvelopo komo ponte entre todas las komunitas de sefardis del Imperio Otomano, akseptando biervos de los musafires turkos, los vizinos gregos, makedonios, bulgarianos i serbeskos, i dospues de los maestros italianos i fransezos, fina kriar una lingua mueva, inchida de rikeza ke no puedemos deshar murir, espesialmente oy ke tenemos la teknolojiya para yegar mas pishin a todos.
La fonte kulaneada para eskrivir en Solitreo enel banner de mi oja web fue dezvelopada para el Documenting Judeo-Spanish Project por Nathan Gross i Bryan Kirschen. Es la forma kursiva del alefbet ivrit, kon la kuala los sefardis eskrivieron en Djudeo-Espanyol kaji 400 anyos.