El djugueves d’alkavo aresivi el atadijo de un filmiko ande avlava Luis D’Elia, un kuka ke fue Vise-Ministro de Tierras para el Abitat Sosyal en el governo de Néstor Kirchner; ya kuando un ministerio aresive un nombre tan lungo, es klaro ke no tiene menester de egzistir. El mismo ke dezia que el atentado terrorista kontro los djudios arjentinianos en la fragua de la AMIA de 1994 fue echo por los israelianos i no por los iranianos, endemas de ser amigo de Mahmud Ahmadinejad, Hugo Chávez i Nicolás Maduro. En el filmiko, ke era de una entrevista en la radio Rebelde 740 AM, el troncho este disho ke Tel Aviv ya kedo destryuida por los misiles iranianos i ke Bibi Netanyahu fue matado por Iran, endemas ke los israelianos estan fuyendo del payis por la mar en grandes vapores kon djente gerreyandose por fuyir de Israel, deke el ayroporto Ben Gurion kedo totalmente destruyido. Los jurnalistos ke lo entrevistavan dezian «si, esto es lo ke afita veramente en Israel» i yo, ke moro en Israel, dishi de mi para mi «i este ijo de mil putanas ande topa tantas bavajadas i negreguras?» Este mismo troncho dize ke es el representante de los iranianos en la Arjentina.
Unas orikas dospues, aresivi un mesaj en WhatsApp de la mi madre (avlimos a la demanyana komo siempre) i me demanda kon boz inyervoza «ijo mio, estas bueno? Afito alguna koza?» mientres ke yo aboltava de merkar la komida de midi. Le dishi ke si, todo «bueno», entre atraot (un mesaj ke aresives unos puntos antes de kada atako de misil i ke tiene un sonete ke te aze un burako en el korason ama ke te desha bushkar un abrigo ande meterte) deke Israel mato a Alireza Tangsiri, el kapo de la Marina Iraniana ke krio el blokaj del Estrecho de Ormuz i ke fue desinyado en 2019 Terroristo Global por Estados Unidos i ke en 2013 disho ke “los israelianos son djudios i los amerikanos son kristyanos. Muestro Koran dize ke no podemos ser buenos kon kristyanos o djudios», kuando en Iran moran unos 10 mil djudios i mas de 300 mil kristyanos, la majorita de eyos ermenis -ama los akademikos kreyen ke mas de un milyon de musulmanos iranianos se izieron kristyanos en sekreto, rejetando la Revolusyon Islamika. Deshar el Islam por otruna relijion esta defendido en Iran, kon kastigo de morte para ombres i a lo manko 30 anyos de prizion para las mujeres. Una djoya.
En avlando kon la mi madre, eya me disho ke se topo kon un kolombiano en la sivdad ande eya mora (una sivdad chika serka de Amburgo, Almania) i el le disho a eya «Graciela, mirates los haberes oy? Ya todo Israel kedo bozeado, esos iranianos destruyeron pishin todo el payis».
Mi madre, espantada i araviada, le arespondio «Ke dishites? Mi ijo mora en Israel, yo avlo kon el todos los dias i los iranianos no tienen destruyida dinguna sivdad, ande mirates los haberes, en Al Jazeera?» El troncho, sin dinguna verguensa, le disho a mi madre «tu ijo te avla mentiras, Tel Aviv kedo komo Gaza, el governo israeliano no kere amostrar las imajes ama yo las vidi en un kanal de haberes de TikTok ande avlan lo ke los Amerikanos eskonden de la djente». Mi madre, en supito lo konvido a irse ande se arrapa el guerko, kon unos biervikos finos en Fransez.
Todo esto me izo pensar en el karar de negreguras ke avlan los antisemitos de siedra (i de dirita) ekstrema en los haberes i redes sosialas kon el buto de trokar la opinion de la majorita de la djente. No vo akseptar akeyos ke dizen «yo no so antisemito, so antisionisto ama tengo amigos djudios» o «me plaze la kultura djudia ama yo no kreygo ke Israel tiene dirito de egzistir, los djudios no tienen menester de un payis para eyos». Ijos de mil putanas, partajan filmikos del terremoto en la Turkiya de 2013 o de la Gerra en Ukrania i dizen «Tel Aviv kedo destruyida por misiles iranianos» kuando puedemos mirar ke los reklames estan eskritos en Turko o Ukraniano, o afilu eskriven «Iran destruyo el reaktor nuklear de Dimona», ama amostrando imajes de la sivdad de Dimona ande kayo un misil el shabbat d’alkavo; el reaktor se topa a 15 km de la sivdad, en medio del desyerto, lonsos. Este alhad, un misil iraniano destruyo un tank de petrol en la refineria Bazan de Haifa, ama el huego lo amataron los tulumbadjis en unos puntos; ke dezian estos tronchos? «Iran destruyo la refineria de Haifa!». Djente, yo moro en Yerushalayim i lavoro en el sentro del payis, miro lo ke afita aki kon mis ojos i no kon el telefon komo vozos. O es ke estos tronchos de kulupidia moran en una realita paralela?
O ainda mas negro, el kanal TRT de la Turkiya amostro un filmiko diziendo que los askieres israelianos kemaron una kreatura en Gaza kon sigaros. Ama ke afito veramente? Un palestiniano uzando a Jawad Abu Nassar, su ijiko, komo eskudo umano, kamina verso los askieres; eyos no tenian konosensia ke era una kreatura i le dizen en arabo ke kale arretar; el palestiniano kamina ainda mas i eyos disparan verso la tierra i una de las balas kevro una piedra en pedazikos, dos de los kualos pasaron por el braso del ijiko. Kuando miraron ke veramente era una kreatura i no una kukla reynada de dinamita (esto afita muncho) se aserkaron al palestiniano i reushitaron kitarle el ijiko de los brasos, el kualo lo entregaron a la Kruz Kolorada. El jurnalisto de TRT disho ke el ijiko fue kemado kon un sigaro kuando los israelianos lo torturavan, eskondiendo ke 1) las kemaduras kon sigaro tienen una forma de sirkolo muy espesiala, 2) ke los askieres tenian un filmiko de kuando aresivieron la kreatura i la entregaron a la Kruz Kolorada deke tenia kemaduras en el puerpo i 3) ke el ombre konfeso ke partisipo en el 7 de Oktobre kuando los palestinianos entraron a Israel i mataron viejos, kreaturas i mansevos israelianos en nombre del Dio bendicho ―Allahu Akbar! No es la prima vez ke TRT, el kanal del governo turkano, mete haberes fake o echos kon inteljensia artifisiala kon el buto de influensar la opinion sovre Israel; propagandas ke, avagar avagar, mos aflakan delantre el mundo entero. Goebbels se kedaria orgolyozo de los jurnalistos de TRT.
Es ke los jurnalistos son ainda mas perikolozos, deke a eyos les van kreyer si avlan en un jurnal o kanal de TV, afilu si no es prestijiozo. Este alhad, el Patriarka Katoliko Latino de Yerushalayim keria azer el servis relijiozo del Alhad de Paskalya en la Kilisia del Santo Sepulkro. La Polis israeliana le eskrivio ke estava defendido azer evenementos de mas de 50 benadames en fraguas ke se topan a menos de 1.5 puntos de un abrigo ―Santo Sepulkro esta londje de todos, kon el mas serkano a 3 puntos kaminando pishin, ke pue’ser la diferensia entre bivir i ser amatado por una raketa iraniana. Ke izo el senyor kardenal? Tento ayegarse a la kilisia, ande la polis no lo desho azer el evenemento. Ke disheron los jurnalistos? Ke el Kardenal Pizzaballa fue detenido (en kastilyano sinyifika «meter en prizion» ama tambien «arretar») en Yerushalayim. I todo el mundo oksidental agora se izo katoliko i mas kristyano ke nunka, afilu los de siedra ekstrema, deke es una shans perfekta para maldizir Israel; ama eyos ke no dizen dinguna koza kuando afitan matansinas de kristyanos en el norte de Nijeria. Kale ajustar ke esta defendido meldar en el Kotel i la Mishkita de Al-Aksa por esta razon, anke basho el Kotel se topa un abrigo chiko. Shefes de governo de todo el mundo oksidentalo, komo por enshemplo Giorgia Meloni, Emmanuel Macron, i Pedro Sánchez, akuzaron a Israel de no deshar ke los kristyanos de fiestar su relijion. Se alevantaron los pipinos i aharvaron al bahchevan!
Dunke, el Kardenal avlo en la nochada i remersio la polisiya i disho ke manko entendimiento i ke el si tenia konosensia ke era defendido azer evenementos en la Sivdad Vieja para kudiar la segurita de todos deke miro en los haberes de la TV italiana, i ke reushito aresivir lisensia del Primer Ministro para azer un evenemento chiko. El mismo ijo del guerko ke aze el servis relijiozo vistiendo la keffiya palestiniana ―la kuala no es palestiniana ama irakiana, ama este es otruno sujeto. Este mismo Alhad, el Patriark Melkita (Katoliko de tradision grega) de Antakya informo ke no aprontara prosesiones esta Paskalya deke el terrorismo islamiko en Siria esta pujando atakos kontro los kristyanos i el governo muevo no aze dinguna koza. La kayades de los jurnalistos en Evropa, ansina komo kuando los islamistos matan kristianos en Nijeria, koza ke afita desde 2009 ama ke no embarasa a la djente de siedra en Evropa i Amerika. Djente ipokrita, ke arrova pitas i beza mezuza.
